最強博彩盤路過關神器《串績王》：http://win.on.cc/football/　<br/><br/>阿積士翼鋒古達斯近期成為搶手貨，車路士同阿仙奴據報都想簽呢位加納新星，預計轉會費高達4,000萬鎊(約4億港元)，不過阿積士總監米斯連達日前表示，如果買家繼續「拖字訣」，古達斯嘅轉會費將每日提升，意思叫人「有買趁手」！<br/><br/>現年22歲嘅古達斯近2季火速上位，上年世盃決賽周更有2個入球，據報車路士同阿仙奴都有意將佢收購。阿積士總監嘅米斯連達曾經做過阿仙奴總監，上個月亦成功賣祖利安添巴去阿仙奴，不過今次古達斯轉會似乎就冇人情出賣。<br/><br/>外號「鑽石眼」嘅米斯連達表示：「最好當然係古達斯留隊，但佢同時亦有機會轉會，球會同球員要保持良好關係，最佳做法就係提高透明度。我會話愈接近轉會窗關閉，古達斯嘅轉會費就會每日提升。」阿積士希望盡早有定案，令球會有時間物色代替人選，而轉會仲關係到另一球星艾臣奧馬艾華利斯去留，阿積士希望留用至少其中1人。