意甲球隊卡利亞里宣布，72歲教練雲尼亞里協助球隊成功護級之後，將會離任，並選擇退休，結束38年教練生涯。<br/><br/>卡利亞里上仗擊敗薩斯索羅，現時領先尾三安玻里3分，由於卡利亞里對賽成績較佳，提早1輪護級成功。意大利《天空體育》指雲尼亞里已同卡利亞里方面達成協議，提早前1年解約，其後會方亦確認有關消息，並大讚雲尼亞里係永遠偉大嘅傳奇教練。<br/><br/>雲尼亞里曾經執教拿玻里、車路士、帕爾馬、羅馬、祖雲達斯、國際米蘭等球會，最經典一定係率領李斯特城爆冷奪得2015/16年季英超冠軍。呢位意大利名帥一向有「球隊醫生」之稱，擅於帶領弱隊取得重大進步，佢早於1988至91年就做過卡利亞里主帥，2022年12月回巢，執教當時仲係意乙球隊嘅卡利亞里，上年夏天協助球隊喺升班附加賽決賽勝出，獲得意甲席位。<br/><br/>雖然卡利亞里今季升上意甲之後，成績欠佳，但總算護級成功，雲尼亞里都可以功成身退。