曼城升呢做“4冠王”！周四(17日)凌晨欧超杯大战，欧联盟主曼城靠小将高尔彭马做奇兵，下半场入波1比1逼和欧霸冠军西维尔，最终互射12码赢5比4，史上首度捧走欧超杯冠军，亦系佢哋今年继英超、英足杯同欧联后第4个锦标。<br/><br/>曼城喺奇云迪布尼受伤下，今场意外派21岁嘅高尔彭马担正，呢位英格兰U21球星盛传将被放走，估唔到喺呢场大战做奇兵，佢嘅表现亦相当活跃，早段曾有精彩射门被扑，亦频频策动攻势制造埋门，不过曼城未入到波，反而喺25分钟被安尼斯利头槌攻陷，半场落后0比1。<br/><br/>换边后曼城加强进攻，西维尔嘅反击亦相当入肉，直到63分钟高尔彭马做救星，佢喺右路窄位顶入，继社区盾后再为曼城取得入球，两队法定时间踢成1比1平手。互射12码曼城5射全中，西维尔最后一轮就有尼曼查古迪积射中楣，曼城得以射赢5比4捧杯。<br/><br/>高尔彭马传闻获韦斯咸同白礼顿斟介，曼城领队哥迪奥拿赛后亦承认佢可能离队：“我唔知高尔彭马会唔会留队，之前我觉得佢系想转会，依家就唔知道，我相信唔会外借，高尔彭马一系就留队、一系就正式转会。佢今场展现出个性，年轻球员喺呢个舞台表演唔容易，佢踢得好好，仲有一个精彩入球。”<br/><br/>今次系曼城史上第1次赢欧超杯冠军，哥迪奥拿就成为史上首个带领3支球队赢欧超杯嘅领队，佢喺2009年、2011年已帮巴塞隆拿赢过2次，2013年又带领拜仁慕尼黑夺冠，今次率曼城再尝冠军滋味，继续改写历史。