法國足總周一(21日)宣布，傳奇前鋒亨利正式成為法國U21領隊，雙方簽約至2025年，目標係帶領法國喺明年巴黎奧運會贏得男足金牌。<br/><br/>亨利係法國史上第2射手，不過佢執教生涯成績麻麻，之前教摩納哥同蒙特利爾衝擊都未有成績，上年底世盃後辭去比利時助教一職後，一直處於自由身狀態，今次答應執教法國U21，將會係佢重振教練生涯嘅好機會，尤其明年夏天巴黎奧運會，法國U21被視為冠軍熱門之一。<br/><br/>46歲嘅亨利今次上任，同時獲前昂熱領隊巴迪高擔任助教，法國年青一代人材濟濟，適齡球員包括威廉沙列巴、卡馬雲加等球星，而基利安麥巴比、賓施馬等都曾經表示有興趣喺「主場」出戰奧運，亨利拎住一手靚牌勢爭取佳績。法國U21會喺9月同丹麥U21踢熱身賽，亦會係亨利首度領軍。