意甲名牌羅馬周三(18日)突然宣布，深受球迷愛戴嘅教練迪羅斯被炒魷，並改聘克羅地亞教頭祖歷接手。羅馬球迷對呢個決定非常不滿，部份極端球迷周四(19日)踩入訓練場抗議，並且向球員作出辱罵，認為迪羅斯係一班球員表現差嘅代罪羔羊。<br/><br/>羅馬今年1月解僱摩連奴，曾引起球迷不滿，不過接替嘅羅馬名宿迪羅斯，上任後成績理想，歐霸盃殺入4強後獲得長約，點知今季4場聯賽3和1負後，迪羅斯喺毫無先兆下被炒魷，改聘前拖連奴教練祖歷執教，雙方簽約1年，並有額外1年續約條款。<br/><br/>羅馬球迷對迪羅斯被炒非常不滿，部份極端球迷去到訓練場抗議，向揸車到場嘅球員進行辱罵，包括鬧白賴仁基斯坦迪「喺球場上散步」，而隊長羅倫素柏歷堅尼到場嗰陣，更忍唔住辱罵而回應：「你哋唔使同我講！」羅馬下場聯賽將喺主場對烏甸尼斯。