西班牙名將恩尼斯達7月初離開日職球隊神戶勝利船之後，一度傳出佢可能加盟國際邁亞密，同昔日巴塞隆拿隊友美斯再次拍住上，但呢位39歲老將依家決定去中東掘金，不過並唔係去沙特阿拉伯，而係加盟阿聯酋球隊酋長FC。<br/><br/>根據「轉會權威」記者羅曼諾(Fabrizio Romano)爆料，恩尼斯達周二(8日)飛抵阿聯酋杜拜，如無意外，將會同酋長FC簽約1年，並有權再延長多1年合約，意味好大機會踢到40歲。<br/><br/>出身於巴塞隆拿青訓系統嘅恩尼斯達曾於2002至18年效力巴塞一隊，捧過9次西甲及4次歐聯冠軍等錦標，亦為西班牙贏得2010年世界盃及2008、12年兩屆歐國盃冠軍。呢位中場傳球大師5年前轉投神戶勝利船，上陣134場入26球，感到近年不受重用，黯然離隊。