法甲勁旅摩納哥周四(31日)宣布，球會成功向阿仙奴簽入22歲前鋒巴洛根，據報轉會費為3,800萬鎊(約3.8億港元)，雖然呢個價錢喺今時今日嘅轉會市場已非常「普通」，但原來已經係阿仙奴歷來最貴賣人紀錄！<br/><br/>巴洛根係阿仙奴青訓出身，上季被外借去蘭斯大放異彩，喺法甲攻入21球排射手榜第4位，夏天入籍代表美國國家隊上陣，摩納哥今次以3,800萬鎊轉會費收購之外，阿仙奴喺佢下一次轉會中，仲可以分多17.5%嘅「轉手費」，巴洛根同摩納哥簽約5年。<br/><br/>巴洛根喺阿仙奴只係踢過2場英超，不過今次轉會亦創下球會紀錄，打破阿歷士張伯倫喺2017年加盟利物浦嘅3,500萬鎊(約3.5億港元)，成為「兵工廠」史上賣出最貴球員。