周一(4日)凌晨西甲賽事，巴塞隆拿作客2比1擊敗奧沙辛拿，開季4輪有3勝1和，繼續力逼全勝嘅榜首皇家馬德里。巴塞隆拿今場有祖奧菲歷斯同祖奧簡些路首演，教練沙維對祖奧菲歷斯有讚冇彈，似乎非常滿意呢單交易。<br/><br/>巴塞今仗控制戰局，完半場前憑祖利斯古迪接應角球頂入，不過去到76分鐘一次大意，被奧沙辛拿嘅艾斯基爾艾維拉睇到定射入。巴塞之後換入祖奧菲歷斯加強攻力，轉頭羅拔利雲度夫斯基即喺禁區內被拉跌，博到12碼兼令對手食紅牌，「羅拔仔」喺85分鐘操刀射入致勝球。<br/><br/>巴塞教練沙維賽後讚揚祖奧菲歷斯：「我哋缺少單對單過人，球員需要更大膽，換人令我哋中場更有優勢，菲歷斯可以為我哋帶嚟變化，無論踢前鋒定左翼，佢都可以有出色表現。祖奧菲歷斯可以為巴塞帶嚟好多嘢，今日我會特別表揚佢嘅態度。」