拜仁慕尼黑今季成績令人失望，依家喺德甲落後利華古遜10分、歐聯16強首回合又落後拉素0比1，教練杜曹已宣布季尾離任。據德國《圖片報》報道，就算拜仁喺歐聯16強出局，管理層仍未決定係咪即炒杜曹，最大原因係搵唔到合適人選接替，有消息指拜仁新帥人選又有新目標，飛燕諾教練施洛上榜。<br/><br/>拜仁早前宣布杜曹會教到季尾，但佢嘅去留仍會視乎成績每場決定，歐聯16強出局對拜仁嚟講本來係「死罪」，但《圖片報》指管理層仍然十五十六，因為目前未有合適嘅接替人選，但如果勉強留用杜曹，又擔心會製造更多麻煩，包括穆斯亞拿等球員嘅續約問題。<br/><br/>據報拜仁心儀目標係沙比阿朗素，但唔少頂級教練對坐拜仁「三煞位」都有保留，《慕尼黑日報》報道，拜仁已擴大新帥人選範圍，飛燕諾教練施洛成為候選人之一，佢嘅進攻足球踢法獲得唔少支持，高位逼搶戰術同沙比阿朗素都有相似之處，或會成為候補人選。