拿玻里日前喺官方TikTok出惡搞片，疑似貶低球隊首席射手域陀奧森漢，而且有種族歧視之嫌，事件更提升至外交層面，驚動尼日利亞政府，透過外交手段，要求意大利政府處理問題，以確保尼日利亞運動員受到保護同尊重。域陀奧森漢發表聲明，話熱愛拿玻里，當地人都非常善良，希望為事件降溫。<br/><br/>據悉「惡搞風波」發生後，引起尼日利亞政府注意，並對於域陀奧森漢嘅遭遇感到難過，已經聯絡呢位尼日利亞國腳，了解詳情，並透過外交渠道，要求意大利政府處理問題。由於事件牽連甚廣，拿玻里會方日前已發出道歉聲明，表示無意羞辱域陀奧森漢，大讚佢係球會嘅「瑰寶」。<br/><br/>雖然域陀奧森漢嘅經理人一度透露，可能向拿玻里採取法律行動，但呢位24歲前鋒周日(1日)晚發表個人聲明，話2020年加盟拿玻里嘅決定非常正確，當地人一直對佢非常友善及充滿愛，並結識好多朋友，一切對於那不勒斯人嘅指責都唔成立。域陀奧森漢此言一出，應該可以化解今次「惡搞風波」。