皇馬收到噩耗，上仗西甲對畢爾包一役受傷退下火線嘅中堅艾達米列達奧，經過詳細檢查之後，證實左腳膝蓋十字韌帶斷裂，西班牙傳媒指呢位25歲巴西國腳需要休戰6個月，意味今年無法再上陣。<br/><br/>艾達米列達奧上仗踢到下半場初段，衝前搶波時，不慎跣腳受傷倒地，當時神情非常痛苦，需要軍醫攙扶離場，已經心知不妙，賽後隊友祖迪比寧咸立即喺社交網祝佢早日康復。<br/><br/>皇馬正式發表聲明，交代艾達米列達奧傷勢之外，並透露佢將會接受手術，會缺陣一段長時間。艾達米列達奧過去2季都係皇馬防線主力，上季各項賽事上陣51場，除咗防守穩陣之外，仲有7球進帳，佢長抖之下，勢必對「銀河艦隊」防線造成沉重打擊，教練安察洛堤可能需要簽入中堅救亡。