英格蘭職業球員公會（PFA）周四(17日)公布22/23球季各獎項候選名單，最高殊榮嘅「英格蘭球員先生」6人候選當中，曼城有艾寧夏蘭特、奇雲迪布尼同史東斯入選，不過西班牙中場洛迪卡斯簡迪冇份就令人意外，唔少網民都話洛迪冇份係「冇天理」。<br/><br/>英格蘭球員先生係由各級別球員投票選出，今屆係第50年舉辦，不過唔少球迷對洛迪冇份就非常不滿，紛紛留言批評：「洛迪冇份，但冇冠軍嘅沙卡、奧迪加特入圍？貪污！」、「一係加第7個候選人，如果唔係就是但踢走一個畀返洛迪入選」。除曼城3子外，另外3個候選人係布卡約沙卡、馬田奧迪加特同已轉會拜仁慕尼黑嘅哈利卡尼。<br/><br/>冠軍熱門公認為曼城前鋒艾寧夏蘭特，佢喺上季尾已贏得英格蘭記者協會(FWA)選嘅英格蘭足球先生，而且得票率係史上最高，相信球員先生獎座都係佢囊中之物。