西班牙傳媒報道，馬體會同主帥施蒙尼將於今季尾約滿，會方打算同佢續約3年，避免畀曼聯挖角。<br/><br/>曼聯大敗，市場估計紅魔即將進入換帥周期，施蒙尼作為紅魔新帥「候選人」之一，當然搶手。馬體會開季成績理想，現時落後榜首皇馬3分排第3，但少打1場，有機會同皇馬巴塞拗手瓜，當然要留住施蒙尼呢位鐵帥。<br/><br/>《科貝電台》報道，馬體會準備同施蒙尼續約3年，新合約中加入同歐聯相關條款，要求施蒙尼每年保住歐聯席位，如果失去歐聯資格，雙方可以提前解約。<br/><br/>施蒙尼於2011年底開始執教馬體會，上場擊敗艾拉維斯，係佢執教馬體會第450場西甲賽事，12年來幫馬體會贏過西甲、歐霸盃、歐超盃各兩次，亦兩度打入歐聯決賽得亞軍，咁好戰績，曼聯想撬佢唔奇。