福岡黃蜂今季成績有進步，由歐洲回流嘅中場井手口陽介功不可沒，呢位27歲日本國腳曾於英格蘭、德國、西班牙、蘇格蘭搵食，但由於傷患問題，被蘇超勁旅些路迪「流放」，今年外借畀福岡黃蜂。不過，井手口陽介「留歐夢」未完，誓要幫福岡黃蜂奪冠，證明身價，將來重返歐洲球壇。<br/><br/>井手口陽介出身於大阪飛腳，2018年1月加盟當時英冠球隊列斯聯，但隨即被外借去西乙球隊利安尼沙，半年之後再被外借去德乙球隊格雷特霍夫，上陣7次入1球。當年井手口陽介未能喺歐洲企穩陣腳，其後重返母會大阪飛腳。<br/><br/>不過，井手口陽介仍然心繫歐洲，2年前轉投擁有多位日本球員嘅些路迪，可惜加盟冇耐就受重傷，傷愈後被投閒置散，結果今年返回日本，加盟福岡黃蜂。雖然井手口陽介歐洲之旅多次受挫，但佢認為自己正值當打之年，仍然希望去高水平聯賽搵食。<br/><br/>呢位中場硬漢協助福岡黃蜂打入日聯盃4強，用行動證明實力，如果奪得冠軍，屆時些路迪主帥羅渣士可能會收番佢自用。