車路士班主保利入主後，查數發現球會帳目混亂，今年中主動向英格蘭足總、歐洲足協等申報。據英國《泰晤士報》報道，足總正調查車路士喺2013年收購韋利安同伊度奧嘅轉會，車路士曾向神秘「第3方」支付，懷疑涉及違規操作，有可能會被罰扣分。<br/><br/>報道指車路士喺10年前，用3,000萬鎊向俄羅斯球會安治收購巴西翼鋒韋利安，1日後再用200萬鎊簽埋安治前鋒伊度奧，當時車路士班主仲係俄羅斯油王阿布拉莫域。不過保利接手後，發現當中有部份轉會費以外嘅款項去咗俄羅斯嘅神秘第3方，而且未有收錄喺官方帳目，英格蘭足總已展開調查。<br/><br/>早前英國傳媒亦曾踢爆，車路士喺簽入丹麥中堅安達斯基斯坦臣嗰陣，涉嫌非法向佢爸爸支付巨款。車路士亦發出聲明，表示涉案嘅人都係昔日管理層，依家嘅職員未有涉案，但英國《太陽報》指出，如果證實車路士有違規行為，可能會被罰扣分。