衞冕西甲嘅巴塞隆拿新球季出師不利，周一(14日)凌晨開咧戰作客被基達菲悶和0比0。呢場比賽踢到充滿火藥味，全場合共有3張紅牌同10張黃牌，巴塞教練沙維同翼鋒拉芬夏比洛尼都被逐，球證嘅判決令巴塞非常不滿。<br/><br/>巴塞今場進攻質素麻麻，雙方埋牙亦出現唔少犯規，42分鐘巴塞翼鋒拉芬夏比洛尼被指喺跑動中開肘，被球證直接出示紅牌；57分鐘基達菲亦打少個，謝美馬達2黃1紅被逐，10打10之下巴塞攻勢開始入肉，但逃唔過主場硬朗防守，沙維喺70分鐘再因投訴過激被逐，成為今場第3個「紅牌阿姑」。<br/><br/>今場補時長達17分鐘，完場前再有爭議判決，巴塞嘅朗奴阿拿奧祖禁區內被踢跌，但VAR檢查後指犯規發生前，巴塞中場加維先犯手球，最終冇判罰12碼，賽事0比0結束。沙維賽後炮轟球證：「如果呢場代表西甲，我明點解西甲開始冇人睇，今場波被球證一手摧毀。」