車路士年初用1億歐元(約8.27億港元)，搶贏阿仙奴簽入烏克蘭翼鋒梅迪歷，不過呢位22歲新星表現麻麻被指「水貨」。車路士今個星期迎戰阿仙奴前，梅迪歷表現有復甦迹象，上場更為烏克蘭射入世界波，連效力阿仙奴嘅烏克蘭「大哥」辛真高賽前都要「恐嚇」，叫梅迪歷今場唔准入波！<br/><br/>梅迪歷潛質優厚，但轉會車路士後明顯迷失，直到最近開始有起色，周中為烏克蘭喺歐國外入波，拎到首個國際賽入球後信心大增，辛真高就「惡嚇」話：「我警告咗佢啦！如果佢今個星期(對阿仙奴)入波，我會扯爛佢蛋蛋！不過我都好戥佢開心，呢個入球意義重大，可以畀到佢信心，嚟緊我哋要返球會準備大戰，所以梅迪歷...我再警告你多一次...」<br/><br/>梅迪歷今季為車路士喺7場聯賽上陣，其中只有3場係正選，今個月初作客富咸拎到佢喺英超第1個入球，似乎已逐漸適應車路士同英超嘅比賽節奏。