周三(25日)凌晨歐聯B組，阿仙奴作客以2比1擊敗西維爾，前鋒「耶穌仔」加比爾捷西斯貢獻1次助攻及射入1球，佢今屆3場分組賽都有波入，但係呢位巴西國腳卻不幸受傷，將會接受詳細檢查，可能缺陣周六(28日)晚英超主場對錫菲聯。<br/><br/>阿仙奴反客為主，上半場補時打反擊，2位巴西前鋒合作，加比爾捷西斯後場一下精準直傳，加比爾馬天尼利單刀，再扭過西維爾門將尼蘭特，射入空門打開紀錄。<br/><br/>換邊後冇耐，加比爾捷西斯喺左路個人表演，勁射入網。雖然西維爾58分鐘由中堅尼曼查古迪積頂入追至1比2，但始終未能收復失地，分組賽3戰仍然不勝。至於阿仙奴有6分在手，以1分優勢力壓和波嘅朗斯，升上榜首。<br/><br/>不過，阿仙奴贏波亦付出代價，加比爾捷西斯踢到81分鐘，因為腿筋受傷退下火線，賽後佢話：「我感到唔妥，將會接受檢查，依家只能等報告，我認為應該冇乜大礙。」由於阿仙奴下場英超對手只係包尾嘅錫菲聯，相信領隊阿迪達應該會收起加比爾捷西斯，以免佢傷勢惡化。