現年30歲嘅英格蘭中場巴克里，今季重返英超加盟新升班嘅盧頓，表現脫胎換骨，近2場對阿仙奴同曼城雖然輸波，但佢嘅表現就大獲好評。據報巴克里嘅出色表現已引起英格蘭領隊修夫基注意，有機會重返英格蘭國家隊！<br/><br/>巴克里喺愛華頓出道後被譽為天才新星，但2018年轉投車路士後表現大跌，上季更外流法甲嘅尼斯，足球生涯一直走下坡。估唔到今季重返英超愈戰愈勇，最近連續7場英超正選上陣，係佢6年來首次，上星期對阿仙奴更有入波，據英國《每日星報》報道，修夫基嘅教練團正密切注視巴克里表現。<br/><br/>巴克里曾經33次代表英格蘭國家隊上陣，但對上一次已經係2019年6比0贏保加利亞，該仗佢交出2個入波同1次助攻，唔少球迷留言表示：「巴克里應該取代加雲菲臘斯」、「巴克里+迪格蘭賴斯+祖迪比寧咸，呢條中場可以幫英格蘭贏歐國盃」！