周一(4日)凌晨西甲，巴塞隆拿作客畢爾包被悶和0比0，更加不幸係法蘭基迪莊同柏迪2大中場疑似嚴重受傷，柏迪被換走後更加喺後備席爆喊，教練沙維賽後指2人傷勢嚴重，爭標機會大受打擊。<br/><br/>趁住皇馬同基羅納失分，今場本應係巴塞追分嘅好機會，不過面對畢爾包硬淨防守，雙方都製造唔到太多機會，巴塞更喺上半場連折2將，先有法蘭基迪莊跳頂落地扭傷足踝，要由擔架車載離球場，完半場前再有柏迪拉傷大腿，表現痛苦嘅佢由行出場到返後備席一直痛哭，要由隊友安撫。巴塞殘陣下亦搵唔到入波板斧，最終0比0握手言和。<br/><br/>巴塞依家落後榜首皇家馬德里8，沙維賽後表示：「柏迪同迪莊嘅傷患睇落好差，好不幸可能係嚴重傷患，我哋都好傷心，相信佢哋會缺席一段時間。」除咗2個主力受傷，後衞朗奴阿拿奧祖同教練沙維都拎到第5面黃牌，下場聯賽對馬略卡將要停賽。