曼聯喺歐聯2比3不敵加拉塔沙雷，近7場賽事第5次輸波，領隊坦哈格嘅帥位岌岌可危，尤其曼聯連續2場主場喺奧脫福球場噓聲中離開，就同蘇斯克查當年被炒前嘅場面非常接近。坦哈格賽後回應炒魷傳聞，佢就表明球隊上下，包括管理層都團結一心，似乎未為帥位憂心。<br/><br/>連同上場輸畀水晶宮，曼聯已連續2仗主場輸波，對上一次主場2連敗係2021年10月至11月，亦係蘇斯克查執教嘅最後2場主場比賽，當年曼聯係輸畀曼城同利物浦2大勁旅，蘇斯克查都要食「無情雞」，今次曼聯連輸畀水晶宮同加拉塔沙雷，難免被傳出面臨炒魷。<br/><br/>對於帥位不保傳聞，坦哈格賽後話：「上季我哋非常出色，超乎大家嘅預期，但我哋知道呢個計劃係會有高低起伏，球隊永遠都係團結面對，包括我、總監同埋球隊上下所有人，大家都齊心奮鬥。」曼聯星期六(7日)會喺英超主場對賓福特，要避免主場3連敗。