曼聯今個夏天買人效率極高，就連青訓增兵一樣爽手，據多間權威媒體報道，「紅魔鬼」有望搶走阿仙奴怪物級新星前鋒奧比馬田，呢位16歲丹麥小將上季狂破入球紀錄，甚至喺一場對利物浦U16嘅賽事個人獨取10球，相當誇張！<br/><br/>奧比馬田係阿仙奴青訓重點栽培球員，上季為阿仙奴U18上陣18場攻入32球，當中有6場入3球或以上，包括對諾域治入7球。另外，佢喺上年11月一場U16聯賽，為阿仙奴14比3大炒利物浦，佢一個人就入咗10球，前途無限。<br/><br/>由於奧比馬田未夠年齡簽正式合約，所以各大球會紛紛搶人，拜仁慕尼黑、多蒙特、法蘭克福、紐卡素等都出手，不過曼聯就最有睇頭，據報奧比馬田上周已到奧脫福參觀，將會接納曼聯開出嘅合約，有望成為曼聯明日之星。