英超球會狼隊喺英超開鑼前突然易帥，西班牙教頭盧比迪古同狼隊達成解約協議，據報佢不滿球會嘅轉會策略，所以喺新球季開鑼前3日劈炮。狼隊依家要臨時物色新領隊，消息指前般尼茅夫領隊加利奧尼爾將會接任。<br/><br/>狼隊受到財政公平條例限制，今個夏天未有積極增兵，反而賣走魯賓尼維斯、魯爾占美尼斯、高亞迪、彌敦哥連斯等球星，盧比迪古曾公開批評狼隊未有履行佢加盟前嘅增兵承諾，結果周三(9日)同球會達成解約協議。<br/><br/>狼隊首場聯賽係下周二(15日)凌晨作客曼聯，據報佢哋已經鎖定加利奧尼爾為新帥人選，呢位40歲教頭上季帶領般尼茅夫護級成功，表現獲得好評，不過般尼茅夫夏天改請伊拉奧拿領軍，加利奧尼爾將以自由身同狼隊簽約3年。