英聯盃第2圈周四(10日)進行抽籤，2支今季未能參加歐洲賽嘅豪門車路士同熱刺，都要由呢一圈打起，不過籤運就差天共地，車路士會喺主場迎戰英乙球隊AFC溫布頓，但熱刺就要作客硬撼富咸，亦係呢一圈2場「英超內戰」之一。<br/><br/>除咗8支有份踢歐洲賽嘅球隊外，其餘12支英超球隊都會喺第2圈開始踢，結果出現2場「英超內戰」，包括富咸大戰熱刺，以及諾定咸森林主場迎戰般尼。熱刺對上一次捧盃，就係2008年嘅英聯盃，呢項賽事成為佢哋打破冠軍荒嘅最大機會。<br/><br/>英聯盃第2圈賽事會喺8月底上演，9月底就會進行第3圈賽事，到時曼城、阿仙奴、曼聯等8支歐洲賽球隊都會加入戰團。