熱刺王牌前鋒哈利卡尼即將轉投拜仁慕尼黑，據報球隊已經開始物色代替人選，而賓福特前鋒艾雲東尼就被視為最佳「繼承者」，但最大問題係艾雲東尼正因違規賭博坐波監，要到明年1月先可以上陣。<br/><br/>哈利卡尼毫無疑問係英格蘭首席前鋒，上季入20球嘅艾雲東尼，就係入波第2多嘅英格蘭球員，佢經常返中場嘅柱躉式踢法，加上強勁制空力同射術，都好有哈利卡尼影子。據《Football Transfers》網站消息，熱刺完成賣走哈利卡尼後，將會向賓福特提出收購艾雲東尼。<br/><br/>27歲嘅艾雲東尼因違規賭波，被罰停賽至明年1月，不過9月份就可以開始跟球隊操練，熱刺為奪得心頭好，亦唔介意等艾雲東尼半季，反而轉會費先係最大問題，賓福特去年曾經向買家索價至少6,000萬鎊(約6億港元)。