正喺英國備戰23/24年球季嘅傅家俊，喺社交平台分享去咗曼聯奧脫福嘅短片，原來Marco獲Now TV邀請，今晚（26日）同謝德謙齊齊入奧脫福睇波兼做場邊直播。<br/><br/>Now TV更特別安排Marco及謝德謙，雙雙聯同家人於大戰前，展開一次奥脱福之旅。佢哋喺比賽前一天，到曼聯訓練基地參觀球隊集訓，兼先去奧脫福球場內外打個靚卡。<br/><br/>Marco一直係曼聯Fans，亦都睇過多場曼聯比賽，但原來今次先係佢首次踏足奧脫福，所以心情興奮，今次帶同小朋友一齊睇波，佢仲同囡囡講述自己喜歡曼聯嘅原因，將睇波變成親子活動。<br/><br/>Marco更透露原來好多桌球手都係球迷，例如羅拔臣捧車路士、佩利熱愛阿仙奴等，閒時球手相遇都會講波經，期望有機會跟其他球手，分享今次奥脱福之旅嘅難忘經驗。至於阿謙就期待可以睇到曼聯操練，他更認為奧拿拿係近年難得積極同主動嘅門將，風格近似紐亞，前途無可限量。