周六(20日)德甲賽事，多蒙特作客4比0大勝科隆，早前由曼聯外借回歸嘅查頓辛祖愈戰愈勇，今場一次精彩突破博到12碼，不過就同隊友富克洛上演「爭射」一幕，查頓辛祖最終慘被拒絕，但無阻佢成為贏波英雄，照獲球迷大讚。<br/><br/>查頓辛祖回歸多蒙特第2場即任正選，「蜜蜂兵團」上半場由當耶爾馬倫入波領先，去到58分鐘，查頓辛祖左路一次精彩突破，博到科隆球員犯規，查頓辛祖隨即走去要求「劊子手」富克洛讓畀佢射，不過富克洛拒絕，操刀射成2比0。多蒙特之後再由當耶爾馬倫同尤素法莫高高入波，湊成4比0大捷。<br/><br/>查頓辛祖博12碼片段：https://twitter.com/i/status/1748736376592302496　<br/><br/>富克洛賽後解釋「爭射」12碼事件：「辛祖只係簡單問我可唔可以畀佢射，我就同佢講今日我會操刀，佢都即刻同意，仲叫我一定要射入。辛祖向我施壓係好事，佢想拎到重返多蒙特後第1個入波，佢會喺下個星期做到！」<br/><br/>唔少網民大讚查頓辛祖嘅表現：「踢得好好，繼續努力」、「真正嘅查頓辛祖返嚟啦」、「坦哈格幾乎摧毀咗一粒寶石」、「球員好需要喺一個開心嘅環境踢波，多蒙特畀到佢」。