西甲豪門皇馬計劃明年1月冬季轉會費重開之後，出售老將卻奧斯，據悉開始向多間英超球會推薦呢位33歲中場，包括曼聯。事實上，早於10年前曼聯已經打算簽入呢位德國名將，莫非今次可以一圓未了緣？<br/><br/>卻奧斯將於明夏約滿，皇馬為免屆時人財兩失，計劃提早明年1月出售佢，曼聯成為最大潛在買家，因為卻奧斯10年前幾乎成「魔」，佢承認前曼聯主帥莫耶斯當年曾邀請佢加盟，雙方已接近達成協議，但因為莫耶斯被炒，由尹戈爾接手領軍，導致交易未能成事，卻奧斯最終由拜仁慕尼黑轉投皇馬。<br/><br/>曼聯近年連接簽入皇馬球員華拉尼、卡斯米路，難怪「銀河艦隊」想再搵呢個大買家接貨。除咗曼聯之外，紐卡素亦有可能簽入卻奧斯，頂替因為違規賭波被罰停賽10個月嘅辛度東拿利。