西甲開咧前，力圖重奪冠軍嘅皇家馬德里收到極大噩耗，門將泰拔高圖爾斯喺操練期間嚴重受傷，喊住被擔架抬離訓練場，消息指呢位比利時球星左膝前十字韌帶重創，23/24球季面臨全面報銷。據報皇馬已接觸迪基亞，想搵呢位前曼聯門神頂上。<br/><br/>據西班牙《馬卡報》報道，泰拔高圖爾斯將會進行手術治療，最樂觀都要去到明年4月先有望復出，但更加可能嘅係整個23/24球季都唔能夠上陣。31歲嘅泰拔高圖爾斯隨後亦喺社交網表示：「冇諗過會發生咁嘅事，但依家係時候接受現實，並用盡方法去克服，我會盡快回歸，多謝大家嘅支持同鼓勵。」<br/><br/>泰拔高爾圖斯重傷後，皇馬亦即刻做嘢，今夏約滿曼聯回復自由身嘅迪基亞，據報已同皇馬進行接觸，相信成事機會極高。8年前皇馬已幾乎簽入迪基亞，但喺轉會死線日「Fax機故障」令交易告吹，依家雙方有機會再度合作。32歲嘅迪基亞係上季英超「金手套獎」得主，絕對夠資格做皇馬1號。