周三(13日)凌晨歐國盃外圍賽F組，比利時主場以5比0大勝愛沙尼亞，前鋒盧卡古再次扮演「魚腩殺手」，射入2球及貢獻1次助攻，以2球優勢力壓2位曼聯球員麥湯米尼、海倫(前譯：賀蘭特)，以8個入球排今屆歐國外射手榜第1位。<br/><br/>兩隊實力相距懸殊，比利時開賽4分鐘，就由36歲中堅維頓漢入波打開紀錄，跟住盧卡古傳畀李安度杜沙特射成2比0。換邊之後，盧卡古個人梅開二度，臨完場前，比利時由後備上陣嘅基迪拿尼埋齋，贈愛沙尼亞5蛋，以5戰4勝1和，同奧地利一樣有13分，預料兩隊好大機會一齊出線。<br/><br/>主角盧卡古喺球會賽事表現欠佳，但返到國家隊往往有佳作，今屆歐國外踢5場有4場取得入球，合共累積入8球，但其中4球係對愛沙尼亞射入，再次被網民嘲諷係「魚腩殺手」。<br/><br/>呢位30歲前鋒今夏幾經波折，先至加盟羅馬，剛於上輪意甲首次上陣，羅馬今季聯賽3戰不勝，下仗對安玻里，就睇下盧卡古能否做救世主。