曼聯今季開局成績麻麻，加上球場內外是非不斷，令網上出現一片批評浪潮，其中踩得最「用力」嘅人，包括幾位曼聯名宿加利尼維利、堅尼同舒米高等等，曼聯上場贏般尼後，葡萄牙球星達洛治就公然向前輩挑機，批評佢哋係「殺人機器」。<br/><br/>曼聯開季6場輸3場，加利尼維利、堅尼同舒米高等名宿都批評球員同坦哈格表現，5次上陣嘅達洛治表示：「我哋係曼聯，所以每場都要交出表現，因為當你贏唔到波，佢哋(批評者)就會喺四方八面將你殺死，近呢個星期睇得好清楚，呢部殺人機器全速開動。」<br/><br/>不過，達洛治表明曼聯球員冇受影響，而係團結一致為球隊賣命：「當我哋入到卡寧頓訓練基地，所有『噪音』都會留喺外面，對般尼嘅勝仗非常重要，我哋展示出團結一面，球員不斷溝通、互相幫助，我哋要維持呢個水平直到季尾。」