國際足協(FIFA)公布2023年最佳男、女足教練獎項候選名單最後3強，其中男足教練分別係哥迪奧拿、施蒙尼恩沙基、史巴列堤，哥帥今年率領曼城奪得英超、英足盃、歐聯及歐超盃冠軍，相信會以大熱姿態獲此殊榮。<br/><br/>FIFA曾於9月選出最佳男、女足教練名單5強名單，當時有份入選嘅熱刺領隊普斯迪高路、巴塞隆拿教練沙維，依家被淘汰，剩下哥迪奧拿、施蒙尼恩沙基、史巴列堤。其中哥帥同「細恩」上屆歐聯交鋒，曼城擊敗國際米蘭，預料施蒙尼恩沙基今次競選，應該都唔係哥迪奧拿對手。<br/><br/>至於史巴列堤上季率領拿玻里相隔33年再捧意甲冠軍，呢位光頭名帥今夏接手執教意大利國家隊，並打入歐國盃決賽周，但戰績始終同哥迪奧拿有距離。<br/><br/>最佳女足教練最後3強，分別係巴塞隆拿女足教練基拉迪斯、車路士女足領隊希斯、英格蘭女足國家隊主帥威格曼。國際足協將於下月15日公布包括世界足球先生在內嘅各大獎項最後得獎結果。