荷蘭將於周五(8日)凌晨歐國盃外圍賽主場對希臘，「橙衣兵團」史上入波第2多嘅射手迪比受傷冇入選，利物浦前鋒加普陷入入球荒，今季仲未入波，幸好荷蘭人才輩出，2位喺德甲搵食嘅進攻猛將沙維西蒙斯、當耶爾馬倫狀態大勇，成為球隊爭取入波嘅關鍵人物。<br/><br/>現年20歲嘅沙維西蒙斯出身名門，曾於巴塞隆拿青年軍受訓，其後加盟巴黎聖日耳門(PSG)，上季轉投燕豪芬，上陣48場入22球，結果PSG今夏回購佢，再外借去RB萊比錫。呢位天才新星轉戰德甲，上陣3場已入2球及3次助攻，表現光芒四射，可以話係現時荷蘭陣中狀態最勇猛球員。<br/><br/>由於荷蘭過往鋒線人才眾多，沙維西蒙斯只有5次國家隊上陣經驗，但隨住迪比、貝雲積受傷落選，沙維西蒙斯今仗有望趁機擔正。<br/><br/>至於效力多蒙特嘅24歲射手當耶爾馬倫今季德甲3次上陣亦有2球進帳，佢可以勝任前鋒同右翼，技術非常全面，令荷蘭主帥朗奴高文戰術部署方面更靈活，今仗等睇沙維西蒙斯、當耶爾馬倫表演。