周日(3日)凌晨德甲，近期頻頻入波嘅哈利卡尼忽然啞火，演出走晒樣，連帶拜仁慕尼黑亦陷入苦戰，落後之下，作客驚險反勝慕遜加柏2比1，力保今季聯賽3戰全勝走勢。<br/><br/>開賽30分鐘，拜仁慕尼黑被慕遜加柏嘅日本中堅板倉滉頂入大門，換邊之後，拜仁中場甘美治成為反勝關鍵人物，貢獻2次助攻，佢先傳畀利萊辛尼近門射入扳平。戰至87分鐘，甘美治開出角球，由泰爾頂入以2比1絕殺慕遜加柏。<br/><br/>至於身價高達1億鎊(約9.87億港元)嘅前鋒哈利卡尼之前2場德甲轟入3球，但今仗腳頭無靈，踢到補時先至被換走，有31次觸球，但3次射門都唔中目標，17次傳球僅11次成功，14次同對手對抗更加只得2次成功，仲有11次失去控球權，令人擔心呢位英格蘭國腳「蜜月期」已過。