英超球證西蒙賀柏喺熱刺對利物浦一仗嚴重犯錯，誤判利物浦一個合法入球詐胡，期間再趕紅軍兩名球員出場，利物浦最終輸波，雖然裁判公司事後承認犯錯，但正所謂意見接受，態度照舊，西蒙賀柏下輪聯賽繼續執法，被安排擔任VAR裁判。<br/><br/>利物浦上場遭遇相當悲慘，早段居迪斯鍾斯被罰紅牌已經充滿爭議，紅軍踢少個之下路易斯迪亞斯入波，又被判越位食詐胡，事後裁判公司發聲明承認迪亞斯詐胡屬誤判。<br/><br/>但係錯咗又點，引發爭議嘅西蒙賀柏一樣唔使「停雞」，下輪英超佢繼續有工開，負責愛華頓對般奴茅夫場波嘅VAR裁判工作，到時場波吹成點，球迷肯定睇到實。至於當日犯錯嘅VAR裁判團中，就有兩位工作人員要為錯誤負責，被罰暫停執法工作。<br/><br/>至於受害嘅利物浦就繼續窮追猛打，要求裁判公司徹底調查，包括審查當日裁判團隊中，有3人喺賽前48小時去咗阿聯酋執法搵外快，並要求公開現場球證對話紀錄，搵出犯錯嘅原因。