曼聯上仗英超落後2球劣勢下，反勝諾定咸森林3比2，領隊坦哈格最後30分鐘派出查頓辛祖上陣，希望加強攻勢，但呢位翼鋒表現再次令人失望，反而成為球隊負累，根據統計，佢今場0入球、0助攻、0射門、0過人、0關鍵傳球、成為「五無」。最離譜係查頓辛祖今季英超3次上陣，竟然連1次射門都冇，被網民嘲諷佢仲係一位進攻球員嗎？<br/><br/>查頓辛祖效力多蒙特期間，上陣137場入50球及64次助攻，但2年前以7,300萬鎊(約7.2億港元)轉會費加盟曼聯之後，表現長期低迷，上陣81場僅入12球及6次助攻，簡直判若兩人。最大鑊係呢位23歲英格蘭國腳似乎已經信心盡失，上季更曾經要去荷蘭接受心理治療，雖然之後演出一度有起色，但現時又打回原形。<br/><br/>最諷刺係另外2位喺多蒙特打出名堂嘅新星艾寧夏蘭特、祖迪比寧咸分別轉投曼城、皇馬之後，表現更上一層樓，反觀查頓辛祖直插谷底，都唔知係曼聯黑仔，亦或查頓辛祖唔好彩。