周二(24日)凌晨亞冠盃分組賽，沙特阿拉伯球隊繼續發揮「巨星威力」，伊蒂哈德同希拉爾齊齊贏波，喺所屬小組排榜首。<br/><br/>C組伊蒂哈德主場迎戰伊拉克球隊空軍體育會，今場收起賓施馬同法賓奴兩位球星，面對屯重兵防守嘅客隊一度陷入苦戰，好在法國中場尼高路簡迪做救世主，佢喺補時4分鐘交出助攻，畀哈密特艾拿12碼點臥射入網，小勝1比0登上榜首位置。<br/><br/>另一支沙特勁旅希拉爾，同日喺D組就贏得好輕鬆，雖然巴西球星尼馬重傷缺陣，但希拉爾仍然火力十足，主場出擊憑阿歷山大米祖域連中三元，米連高域沙域、艾貝歷克同艾馬爾基各入1球，6比0狂數印度球會孟買城，希拉爾贏波後3戰得7分排小組榜首。