歐國外G組賽事全部結束，塞爾維亞周一(20日)凌晨主場2比2逼和保加利亞，有驚無險下以小組次名進身決賽周，亦係塞爾維亞自從獨立後第1次殺入歐國盃決賽周。塞爾維亞今仗一度陷入出局危機，不過蘇保斯拉爾喺另一邊為匈牙利贏波，亦為塞爾維亞派定心丸。<br/><br/>塞爾維亞今場只要唔輸波，或者黑山喺另一邊贏唔到匈牙利就可以出線，塞爾維亞17分鐘先開紀錄後，睇落一帆風順，不過黑山喺另一邊半場領先，塞爾維亞下半場早段更連失2球反輸1比2，一度處於出局邊緣，好在冇幾耐之後，就傳出蘇保斯拉爾3分鐘內幫匈牙利連入2球消息，塞爾維亞食咗定心丸後，完場前8分鐘追和保加利亞2比2，而匈牙利亦順利3比1擊退黑山。<br/><br/>塞爾維亞對上一次喺2000年出戰歐國盃，當時仲係用塞爾維亞和黑山身份參賽，今次係佢哋獨立後首度殺入決賽周，王牌前鋒阿歷山大米祖域賽後表示：「最重要係我哋拎到需要嘅成績，呢一日非常美妙，係我國家隊生涯最佳時刻。呢支球隊受到好多質疑，但我哋證明自己可以挑戰最高水平嘅賽事。」