周一(20日)凌晨西甲賽事，維拉利爾主場同皇家馬德里激戰踢成4比4，「黃色潛艇」喺一度落後3球情況下，憑阿歷山大索洛夫食出「大四喜」追和，呢位挪威前鋒亦以23球登上射手榜第1位，用入球證明挪威唔係得艾寧夏蘭特一個前鋒孭飛！<br/><br/>皇馬為歐聯決賽準備，今場繼續半力出擊，上半場憑艾達古拿梅開二度，加上祖斯奴同盧卡斯華斯基斯入波，半場領先4比1。但換邊後維拉利爾大反撲，索洛夫喺48到56分鐘短短8分鐘內連轟3球，連埋上半場入波食出「大四喜」，戲劇性打和4比4完場。<br/><br/>索洛夫今季西甲累積23球，超越基羅納嘅杜夫比克(21球)同皇馬嘅祖迪比寧咸(19球)，登上射手榜第1位，西甲只剩1輪下大有機會贏得金靴獎。曼城嘅艾寧夏蘭特已落實奪得英超金靴，如果索洛夫又贏埋西甲金靴，將係史上首次有2位挪威前鋒齊做歐洲5大聯賽神射手。