周日(27日)凌晨意甲，AC米蘭主場以4比1大勝拖連奴，2位今夏由車路士來投嘅球員基斯甸普列錫、羅夫度斯卓克分別入波同助攻，其中翼鋒普列錫更加係開季2場聯賽都取得入球，AC米蘭靚簽「車仔雙引擎」，成功為球隊注入強大動力。<br/><br/>基斯甸普列錫繼上仗聯賽入波之後，今仗上半場又建功，接應羅夫度斯卓克橫傳射入空門，呢2位前車仔隊友果然好有默契。根據OPTA統計，普列錫成為自1994/95年球季意甲實行3分制以來，第5位首2場聯賽都有波入嘅AC米蘭新兵。<br/><br/>雖然拖連奴由後衞舒侯亞斯射入扳平，但A米臨完上半場再由基奧特射入12碼，加上左閘迪奧靴南迪斯近門建功拉開紀錄。換邊之後，拉菲爾利亞奧博到12碼，基奧特再次主射入網，呢位36歲法國老將開季2場入3球。<br/><br/>AC米蘭今夏出售中場主力辛度東拿利，被指自斷一臂，但隨住2位新兵基斯甸普列錫、羅夫度斯卓克有出色發揮，令球隊實力有增無減，意甲2戰2勝。